Robert Elsie
Fjalori historik i Shqipërisë
Shqip: Eva Bani
ISBN 978-9928-03-095-5
Uegen, Tirana 2011
735 pp.
Botimi i ri i Fjalorit Historik të Shqipërisë aktualizon informacionin mbi Shqipërinë dhe
shqiptarët deri në mes të vitit 2009. Hartimi i një fjalori historik për një vend të tërë, dhe në
rast të një vendi të vogël si Shqipëria është mjaft i vështirë, dhe bëhet edhe më i vështirë po
të marrim parasysh se Shqipëria ka qenë historikisht vend i mbyllur. Kjo vlen në mënyrë të
veçantë sepse ende nuk ekziston një shkencë historiografike e
besueshme dhe objektive në Shqipëri e cila do të shërbente si
bazë për një libër të tillë. Censura dhe vetëcensura politike për
dhjetëvjeçarë bashkë me patosin nacionalist në shekuj kanë
prodhuar shumë mite dhe shtrembërime. Historianët dhe
akademikët shqiptarë e kanë pasur të vështirë të heqin dorë prej
kultit dhe glorifikimit të heronjve dhe të hedhin pas krahëve
deklaratat pompoze të madhështisë kombëtare. Historia
shqiptare noton mes mitesh të cilat kanë shërbyer si mburojë
dhe maskë për të fshehur kompleksin e inferioritetit të një
populli të vogël dhe të varfër, por nga ana tjetër mitet kanë
shërbyer si mjet bashkimi në kohë krizash për kombin. Poeti Dritëro Agolli e ka cilësuar
Shqipërinë si vend që ka prodhuar më shumë histori sesa grurë.
Ata pak historianë të huaj që e kanë trajtuar në thellësi historinë shqiptare dhe kanë botuar
në këtë fushë, kanë rezultuar më të besueshëm, duke punuar nga një këndvështrim më
objektiv. Megjithatë ende mbizotërojnë pretendime të gabuara dhe pikëpamje naive. Ende
nuk është hartuar një histori e plotë, e gjithanshme dhe e besueshme për Shqipërinë. Ky libër
nuk synon të mbushë këtë zbrazëti. Ai i ofron lexuesit vetëm të dhëna të përgjithshme
faktike në lidhje me vendin, zhvillimin e tij historik, rrethanat aktuale dhe kulturën e
popullit shqiptar.
Shumica e rreth 750 termave në Fjalorin Historik të Shqipërisë janë në lidhje me individë. Aty
përfshihen jo vetëm personalitete të historisë shqiptare por edhe figura publike dhe drejtues
politikë të kohës së sotme, si dhe studiues shqiptarë e të huaj që kanë dhënë kontribut të
ndjeshëm në studimet dhe kulturën shqiptare. Bibliografia e pasur në fund të vëllimit, e cila
mbase plotëson më shumë nevojat e lexuesit anglishtfolës sesa të lexuesit shqipfolës, është
lënë si në versionin anglez.
Thënë shkurt, Fjalori Historik i Shqipërisë rreket të japë një përmbledhje të gjerë jo vetëm të
historisë shqiptare, por edhe të Shqipërisë së ditëve tona në këtë fillim shekulli, duke hedhur
dritë sa në të kaluarën, po aq edhe në tashmen e këtij vendi evropian i cili përpiqet të ndahet
nga e kaluara staliniste dhe mungesa e zhvillimit. Nuk duhet harruar se për një gjysmë
shekulli, Shqipëria ishte si planet më vete i ndarë prej Tokës mëmë. Që prej rënies së
komunizmit, shqiptarët janë në kërkim të mundimshëm të vendit të tyre në familjen e
kombeve evropiane.
Robert Elsie
Hagë, Holandë